最近好多新手炒股炒到輸身家 https://lih.kg/2846967 - 分享自 LIHKG 討論區

轉貼 最近好多新手炒股炒到輸身家

https://lih.kg/2846967

- 分享自 LIHKG 討論區

 1. 唔好買末日期權

本金唔多嘅新手可能覺得正股好貴，就走去玩末日期權。

但係末日期權嘅勝率可能仲衰過賭波。貪入場費低而揀一個勝率極低嘅炒法係最蠢嘅決定。

唔好將自己擺喺一晚可以輸哂身家嘅處境。

2. 長期趨勢比短期變化更容易預測

好多新手會直覺地以為短期變化應該比長期趨勢更容易預測。

但唔一定嘅，例如我好肯定5年後Microsoft嘅股價會高過今日，但我完全唔知道下一個交易日會係升定跌。

一間公司好勁都唔代表佢會日日升。Tesla、Nvidia係好勁，但係勁嘅公司都唔代表會日日升。如果你投資一間公司係因為睇好佢嘅長期趨勢，就唔好不斷去捕捉佢短期嘅升升跌跌。

3. 買股票唔好淨係貪高回報，要諗吓承唔承受到跌幅

有啲人見某隻股票走勢好勁就all in高追，忽略咗佢嘅波幅可能大到你承受唔到。

投資並非只係睇預期回報。應該考慮埋依隻股票係咪可以放心持有。

好似TQQQ咁，有睇過去走勢就會見到TQQQ久唔久都會由高位跌2-3成，淨係2021年都已經試過幾次，但原來好多人買之前真係完全唔知或者無諗過。

4. 做咗功課唔代表可以提高表現

好多阿叔成日睇馬經，但係睇咗幾十年都賭馬都係贏唔到錢。

有啲巴打睇咗幾條YouTube片、睇吓新聞、學吓技術分析、上吓股票課程就以為自己買嗰隻股票會升。

你付出咗精力唔代表一定有回報嘅。你諗吓點解啲阿叔睇咗幾十年馬經都無進步過。

同埋唔好見到有人開班、開YouTube、開Patreon就假設對方講嘢一定啱。

5. 唔好淨係聽唱好嘅消息，要聽埋反對嘅聲音，仲要睇埋佢地點樣反駁對方

唔同嘅投資工具、策略都會有人支持有人反對。如果你淨係聽唱好嘅消息，就會忽略咗負面因素。不過你聽哂兩邊之後多數都判斷唔到邊個啱，淨係覺得兩邊都有道理。

你要睇埋佢地點樣反駁對方，咁你會諗得更加清晰。同埋如果唱好嗰面唔敢接受反對聲音嘅挑戰，就多數都係伏。

6. 唔好訓身買不知名嘅公司

你賭波都唔會拎成副身家去賭一場俄超掛？

7. 輸咗嗰陣唔好心急追返

有啲巴打輸咗會好心急想追返，然後作出草率嘅投資決定，甚至採取更高風險嘅炒法。

賭仔性格通常只會令你輸更多。如果你輸好多，不如唔好睇股市住，等你冷靜返先再部署，唔好俾一時嘅情緒影響你嘅決定。